ILOILO CITY – “Indi ka magkabalaka kay ang gobyerno ta, indi gid magpabaya diri, amo ni nga ari ko kay gapati ko nga buligan kita sang presidente. Kun may magkadto da sa imo, sunod ka na lang ha, kay ari kami gahulat sa imo.”
Nagahilibion samtang nagapangayo sang bulig sa ‘Operation Bulig Ilonggo’ si Mercy Blanco, residente sang Brgy. Compania, Molo, Iloilo City kag iloy sang isa ka Overseas Filipino Worker (OFW) nga nagatrabaho sa Lebanon.
Suno kay Blanco, masobra isa ka tuig na nga nagatrabaho sa amo nga pungsod ang iya anak nga si Mernie Joy apang gusto na sini nga magpauli bangud ginapahayag nga ‘expired’ na ang iya kontrata sang Disyembre kag biktima pa sang illegal recruitment.
Nangin mabaskog pa ang kagustuhan ni Mernie Joy nga magpauli sa Iloilo bangud sang nagataas nga tensyon sa Iran kag Estados Unidos, kag nagakahangawa ini suno kay Blanco nga basi madalahig ang pungsod Lebanon sa inaway, ilabi pa bangud nagapadayon ang linupok nga ila mabatian.
Suno sa iloy, yara subong sa ospital ang iya anak bangud na-admit ang ginabantayan sini nga bata, apang wala untat ini sa pagpanumdom kun ano ang posible nga matabo sa iya sa tion nga makaguwa na sa ospital ang bata.
“Wala ako kabalo kun malapit sya sa embahada, pero sang katapusan ko nga contact sa iya, nagsiling siya nga ‘Mama gusto ko na gid magpauli kay basi kun indi nyo na ako makita pagkatapos ni.’ Single Mom to sya mo, tapos may anak pa sya diri nga gina-ulikdan amo na nga ginapadihutan ko gid nga makapauli siya,” emosyonal nga pahayag ni Blanco.
Dugang pa sang natungdan, antes pa man ang atake sang Estados Unidos sa Iran kag ang pagtimalos sang Iran sa Estados Unidos, nangin magamo na nga daan sa pungsod Lebanon bangud sa mga ginapatigayon nga petisyon sang mga Lebanese bangud sa mataas nga buwis.
Magluwas diri, halos katunga na sang sweldo ang nabuhin sa iya anak, kag suno kay Blanco, “te nagsiling siya sa akon nga ‘Mama, kun dira ko sa Pilipinas, makaobra ako sang bisan ano lang.'”
“OPERASYON BULIG ILONGGO.”
“We have to verify first,” ang sabat ni Overseas Workers Welfare Administration (OWWA) 6 Welfare Officer 3 Jack Arroyo.
Sa interview sang Bombo Radyo kay Arroyo, iya ginpahayag nga maga-coordinate ang pamunuan sa embahada sa Lebanon agud makadtuan ang employer sang anak ni Blanco kag mahisayran kun ano ang problema.
“Ang expired contract, may solusyon ina ya. Pero ang problema is ang employer. Kay I think may ginpirmahan ina sila, kag dapat naton hibaluon kun pasugtan siya kay basi kun may kasuhay pa nga matabo,” pahayag ni Arroyo.
Suno kay Arroyo, mas maayo kun direkta nga impormasyon gikan sa Philippine Embassy ang mabaton bangud delikado kun wala na-verify ang istorya sang OFW bangud posible nga sa baylo nga makabulig, magalala pa ang sitwasyon.
“We will be here until the need arises, samtang mataas pa ang tensyon sa Middle East,” suno kay Arroyo.
Ang Operation Bulig Ilonggo ang ginlunsyar sang Iloilo Provincial Government bilang bulig sa mga Ilonggo nga may yara sang himata sa anuman nga pungsod sa Middle East.
Napahamtang ang help desk sa lobby sang Provincial Capitol kag may mga opisyal nagikan sa Department of Foreign Affairs (DFA), Overseas Workers Welfare Administration (OWWA), Department of Labor and Employment (DOLE) kag Philippine Overseas Employment Administration (POEA) agud magsabat sang mga inquiries sang mga natungdan.
