ILOILO CITY- Nagpaathag ang Local Government Unit sang Oton, Iloilo kasunod sang reklamo sang ginatos nga mga e-bike drivers nga indi sila makabyahe bangud wala sila ginahatagan sang permit sang municipal council.
Partikular nga gintumod sang mga drivers amo si Oton Vice-Mayor Neil Olivares kag iban nga Sangguniang Baya Members nga suno sa ila nagapamalabag gid nga mahatagan sila sang permiso nga makabyahe.
Sa interview sang Bombo Radyo kay Vice-Mayor Olivares, iya ginpahayag nga may yara gid man sang ordinansa ang banwa may kaangtanan sa pag-regulate sa mga manual kag electronic public traysikad humalin pa sang Enero 2023.
Apang, suno kay Olivares ang ginasunod nila amo ang administrative Order sang Land Transportation Office kun sa diin ang mga salakyan nga yara sa kategorya nga L1 ukon mga salakyan nga duha ang royda apang ang kadasigon wala nagalapaw sa 50khp, kag L2 nga may tatlo ka royda apang ang kadasigon wala nagalapaw sa 50kph, ang wala nalakip sa mga salakyan nga ginatugutan nga makabyahe.
Nahibaluan nga ang ginabyahe nga mga e-bike sang mga tagreklamo nga drivers ang yara lang sa 25-30 kph ang kadasigon.
Natalana naman nga magpatawag sang committee hearing ang konseho sa masunod nga semana kun sa diin imbitado ang mga stakeholders agud maathagan ang mga drivers tuhoy sa ila reklamo.
