Depensahan sang Senado sa bicameral conference committee meeting ang ginhimo sini nga pagkakas kag pagsaylo sang P152 million nga confidential and intelligence funds sa proposed 2023 national budget.
Matandaan nga gin-aprubahan sang Senado ang realignment sang P152M halin sa confidential and intelligence funds kag ginsaylo sa maintenance and other operating expenses sang pila ka ahensya sang gobyerno.
Lakip diri ang:
* P100 million halin sa Department of Education
* P5 million sa Department of Foreign Affairs
* P19.2 million sa Department of Justice
* P2 million sa Department of Social Welfare and Development.
* P6 million sa iban nga executive offices
* kag P20 million sa Office of the Ombudsman
Bangud lain-lain ang bersyon sang Senado kag Kamara sa proposed P5 trillion-plus national budget para sa 2023, kinahanglan nga i-justify sang Senado ang realignment sang confidential funds.
Suno kay Senate finance committee chairperson Sonny Angara, i-justify man sa bicameral conference kun sa diin kuhaon ang pondo kag kun diin ibutang.
Ginpahayag man ni Angara nga ginalauman nga mahuman na ang reconciled version sang 2023 budget bill subong nga semana.
Sa bahin naman sang Kamara, nanawagan si ACT Teachers Representative France Castro nga himuon na lang nga ayuda ang confidential and intelligence funds.
Sa kalkulasyon ni Castro, kun i-realign ang kontrobersyal nga P9.3 billion nga confidential fund kag himuon nga ayuda kag hatagan sang tag-P10,000 ang kada pigado nga pamilya, buot silingon, yara sa 930,000 ka pamilya ukon 4,650,000 ka pigado nga mga Pinoy ang maka-benepisyo.
