Nakumpiskar sang mga katapo sang Bureau of Customs (BOC) sa Port of Clark sa Pampanga ang ginabanta P30.78 milyon nga balor sang iligal nga droga nga gintago sa sulod sang cable spool.
Suno sa BOC, gindeklarar nga “solar cables” halin sa Netherlands ang shipment kag padulong kuntani sa Pasig City.
Sang gin-usisa ini sang maayo, nadiskubrehan nga may yara sang anum ka mga plastic pouch nga nakatago sa sulod sang kable nga nagabug-at sang masobra sa anum ka kilo.
Nakumpirma sa examination nga ketamine ang sulod sini nga isa ka sahi sang ginadumilian nga droga.
“The shipment was flagged for examination based on derogatory information received from PDEA. A K-9 sniff test yielded positive indications of illegal substances, prompting a full physical inspection of the parcel,” suno sa Customs.
Kasunod sini, ginpagwa ang Warrant of Seizure and Detention para sa shipment sa paglapas sa Republic Act No. 10863 ukon ang Customs Modernization and Tariff Act (CMTA) kag R.A. No. 9165 ukon Comprehensive Dangerous Drugs Act of 2002.
