Gin-abi-abi sang MORE Electric and Power Corporation (MORE Power) ang ruling nga ginpaguwa sang Supreme Court En Banc kun sa diin gin-uphold ang ila franchise expansion sa duha ka mga distrito sa probinsya sang Iloilo.
Base sa desisyon sang en banc nga napetsahan sang Hulyo 30 kag ginsulat ni Associate Justice Rodil V. Zalameda, nakasaad nga wala sang constitutional right ang electric cooperatives sa eksklusibo nga prangkisa sa sulod sang ila nga coverage areas.
Sa sini man nga argumento nakasandig ang pagbasura sa petition sang Iloilo Electric Cooperative, Inc. I, II, kag III nga naga-challenge sang validity sang Republic Act No. (RA) 11918. Ini nga layi amo ang nagapasangkad sang prangkisa sang MORE Power sa segundo kag kuarto distrito sa probinsya nga sulod naman sa area sang ILECO.
Kun balikan, matandaan nga nag-file anay ang ILECO sang petition for certiorari and prohibition kag naghingyo nga mag-isyu ang korte sang temporary restraining order kag writ of preliminary injunction para nga ma-invalidate ang Section 1 sang Republic Act 11918 bangud gin-alegar nga ginlapas sini ang ila kinamatarong sa exclusive franchises, due process, non-impairment of contracts, kag equal protection.
Apang pahayag naman sang en banc, base sa Section 11, Article XII sang Constitution, ginadumilian ang exclusive franchises bangud ang prangkisa nga ginahatag sang state ang indi exclusive private property sang franchisee kag dapat magserbe sa “common good” nga pagatumuron sang Kongreso.
Ginpahayag man sang Korte Suprema nga kinahanglan ang kumpetisyon agud mapabilin ang kontrol sa presyo sang elektrisidad. Kun wala sang kumpetisyon suno sa korte, mangin mahapos para sa ILECO nga sila ang magadikta sang presyo.
Sa interview naman sang Bombo Radyo kay Mr. Roel Castro, president kag chief executive officer sang More Power, iya ginpahayag nga ang ruling sang korte amo ang nagahatag-ligwa sa ila nga padayunon ang expansion sang ila prangkisa sa probinsya.
Gin-athag man sini nga sakop lamang sini ang syudad sang Passi kag mga banwa sang Pavia, Santa Barbara, Alimodian, Leon, San Miguel, New Lucena, Zarraga, Leganes, Dumangas, Barotac Nuevo, Dingle, Dueñas, Banate, Anilao, kag San Enrique.
ANONG MASUNOD PARA SA MORE POWER?
Suno kay Castro, mahimo nila makonsiderar ang pag-expand sang serbisyo sa iban pa gid nga mga lugar kun may yara sila sang mabatian kag makit-an nga clamor ukon panawagan sang mga konsumidor para sa mas maayo nga serbisyo kag mas manubo nga presyo.
Ginpahayag ni Castro nga wala pa subong sang mga naistoryahan kaangot sa posible nga joint venture ukon takeover bangud pareho nga naghulat ang electricity providers sang desisyon sang Supreme Court en banc.
Apang suno sa natungdan, bukas siya sa mga tikang ukon arrangements nga para man sa ikaayo sang mga konsumidor.
Samtang nagalapad ang area nga sakop sang serbisyo sang More Power, ginpasalig sini nga indi pagpabay-an sang electric distribution utility ang syudad sang Iloilo.
(Photo: More Power)
