ILOILO CITY – Wala nakasaad sa Anti-Smoking Ordinance sa syudad sang Iloilo ang tuhoy sa pagkumpiskar sang vape gikan sa mga madakpan nga nagagamit sa pampubliko nga lugar.
Sa interview sang Bombo Radyo kay Iñigo Garingalao, pinuno sang Iloilo City Anti-Smoking Task Force, iya ginpahayag nga ang Anti-Smoking Ordinance 2017-002 ang tuga sang pag-amyenda sang regulation ordinance 2014-527.
Suno kay Garingalao, sakop sang nasambit nga ordinansa ang pagdumili sa mga nagapanigarilyo sa pampubliko nga lugar kag ang pagdumili sa pagbaligya sang tanan nga sahi sang sigarilyo malapit sa eskwelahan kag medical facility.
Ginpahayag ni Garingalao nga ang pag-imbento sang vape ang para kun tani sa mga maluyag na mag-untat sa pagpanigarilyo bangud nga mahimo nga makontrol ang nicotine system kag ginakabig nga ‘less harmful’ ipaanggid sa sigarilyo.
Sa pihak sini, gin-athag sang natungdan nga ang ‘less harmful’ ang indi makabig nga ‘safe’ para sa ikaayong lawas sang smoker lakip man sa mga nagahaklo sang aso.
Santo sa Anti-Smoking Ordinance sang syudad, gin-athag ni Garingalao nga ang mga naga-edad sang 18 anyos pasaka nga madakpan nga nagapanigarilyo sa pampubliko nga lugar ang ginahatagan sang citation ticket kag ginapabayad sang multa.
Ang mga minor de edad naman nga madakpan ang gina-kustodiya sang nasambit nga task force para sa safekeeping kag counselling.
Legal ang edad ukon minor de edad man, ginpahayag ni Garingalao nga wala sang confiscation sang vape nga matabo santo sa nakasaad sa ordinansa.
