ILOILO CITY – Ginpaidalom na sa swab test ang pamilya sang duha ka personnel sang Iloilo City Emergency Responders nga nagpositibo sa Coronavirus Disease 2019 (COVID-19).
Nahibalu-an nga ang Patient no. 63 amo ang 28 anyos nga babayi sang distrito sang Jaro samtang ang Patient no. 66 naman amo ang 48 anyos nga lalaki sang distrito sang Arevalo.
Sa interview sang Bombo Radyo kay Iloilo City Mayor Jerry Treñas, iya ginpahayag nga pagkatapos sang swab test, ginpaidalom naman sa quarantine ang pamilya sang duha ka ICER personnel.
Suno kay Treñas, tatlo ka butang ang dapat nga tutukan kag ini amo ang pagpositibo sang duha ka ICER personnel sa COVID-19 rason nga ginpauntat ang trabaho sang nasambit nga talatapan, ang pagpositibo sang pito ka Overseas Filipino Workers nga nag-abot sa syudad sang Iloilo kag ang pagpabilin sang Iloilo City sa Enhanced Community Quarantine.
Ginpahayag ni Treñas nga Enhanced ukon General Community Quarantine man ang deklarasyon sang Inter-Agency Task Force, indi sa gihapon madula ang kamatuoran nga may yara sang COVID-19 sa syudad sang Iloilo.
Nagakahangawa ang mga residente sang isa ka barangay sa distrito sang Arevalo kasunod sang pagpositibo sa COVID-19 sang isa ka personnel sang Iloilo City Emergency Responders.
Sa interview sang Bombo Radyo sa concerned citizen nga nagpahinago lang sang pangalan, iya ginpahayag nga kinahanglan gid nga maghalong paagi sa proper hygiene agud nga indi malatnan sang virus.
Suno sa concerned citizen, kun mahimo, indi na lang magguwa sa balay agud nga indi maka-angkon sang close contact sa infected person.
Bilang senior citizen, ginpahayag sang natungdan nga nagakahangawa siya sa posible matabo apang sa pihak sini, nagalaum siya nga matapos na ang pandemic sa labing madali nga tion.
