ILOILO – Uy-uy ang abaga sang mga manugbaligya sa Cacho Property matapos nga wala sila ginpasugtan ni Iloilo City Mayor Jerry Treñas nga magbalik sa pagbaligya sa kilid sang dalan subong nga paskwa.
Sa interview sang Bombo Radyo kay Niel Dechupa, presidente sang Sidewalk Vendors Association iya ginpahayag nga una na sila nga naghingyo kay Mayor Treñas nga hatagan sila sang 15 ka adlaw nga magbalik baligya sa sidewalks subong lang nga paskwa apang wala ini nagsugot.
Suno kay Dechupa, naghingyo sila liwat sa alkalde sa maka duha na ka bes nga hatagan sila sang tsansa nga makabalik sa pagbaligya sa sidewalk bisan duha nalang ka adlaw bangud man sa tuman ka hinay nga baligyaanay nila sa Cacho Property apang wala man sa gihapon ini ginpasugtan ni Mayor Treñas.
Dugang sang natungdan, bangud diri apektado ang palangabuhian sang mga vendors kun sa diin madamo sa ila mga kabataan ang nag untat na sa pag eskwela bangud wala na sang suporta nga pinansyal.
