Indi magpatigayon sang motu propio investigation ukon kaugalingon nga imbestigasyon ang Iloilo Provincial Internal Affairs Service (PIAS) natuhoy sa kaso sang isa ka lalaki nga pulis nga ginapahayag nagpangimon kag nagpanakit sa 50 anyos nga lalaki sa Barangy P.D. Monfort South, Dumangas, Iloilo.
Ang biktima amo si Jonathan Bucana, residente sang Brgy. Calao, Dumangas, Iloilo.
Samtang ang pulis naman amo si Police Staff Sgt. Benjamin Gomez, assigned sa Intelligence Section sang Tigbauan Municipal Police Station.
Sa interview sang Bombo Radyo kay Police Lieutenant Colonel Manny Manuel, chief sang PIAS, iya ginpahayag nga ang kaso ni Gomez ang indi sakop sa mga basehan sa motu propio investigation.
Suno kay Manuel, ginatugyan na nila sa jurisdiction sang mainstream nga investogative team ang pagpatigayon sang imbestigasyon.
Ginpahayag ni Manuel nga sa tion naman nga magpasaka sang kaso administratibo ang biktima, posible nga maforward sa hearing ang kaso ni Gomez.
Samtang, ginpat-od naman sang National Police Commission (NAPOLCOM) nga aktuhan nila ang kaso ni Gomez.
Sa interview sang Bombo Radyo kay NAPOLCOM Region VI director Atty. Joseph Celis, iya ginpahayag nga indi nila pag i-tolerar ang sahi sang paminatasan nga ginpakita ni Gomez ilabi na kun mapamatud-an ang mga bayolasyon sini.
Suno kay Celis, indi man nila mahimo nga patumbayaan ang mga kapaslawan kag pagwaslik poder sang mga pulis nga makaapekto sa safety sang isa ka tawo.
Sa subong suno sa natungdan, hulaton nila ang mangin resulta sang imbestigasyon kag kun magapasaka sang kaso ang biktima nga ginapahayag napilasan matapos ginpistol-whip ni Gomez.
