Padayon nga nagapanugyan ang Philippine National Police sa publiko nga likawan ang pagpasaway samtang napaidalom ang syudad sang Iloilo sa modified enhanced community quarantine (MECQ).
Sa interview sang Bombo Radyo kay Police Captain Shella Mae Acanto Sangrines, hepe sang Iloilo City Police Station No. 1 kag spokesperson sang Iloilo City Police Office (ICPO), iya ginpahayag nga nagapasalamat sila bangud nagasunod ang publiko sa ginapatuman nga mga health protocol kag border restrictions.
Suno kay Sangrines, sa una kag ikaduha nga adlaw, madamo man ang ila nga ginpabalik sa ila nga mga banwa bangud wala man sang essential nga tuyo sa diin ang iban ang may yara pa sang dala nga mga menor de edad.
May mga senior citizens man nga nagapamilit nga magsulod sa syudad agud magkadto sa ila nga mga anak agud magpangayo sang kwarta apisar madamo naman sang Express Pera Padala.
Samtang sa curfew, aktibo naman ang mga barangay official sa istrikto nga pagbantay sang ila nga mga pumuluyo.
Gin-ako man ni Sangrines nga indi malikawan ang mga pilosopo kag dungol nga mga tawo nga nagarason pa sa pagtuman sang minimum health protocol.
May yara man sang mga pumuluyo suno sa natungdan, nga nagasunod lamang sa health protocols kun yara ang presensya nila nga mga pulis kag barangay officials.
Padayon naman ang pagmonitor sang mga pulis sa mga tawo nga nagamotor kag nagatumpok agud magpicture-picture, kag magkaon-kaon sa mga restaurant.
Panawagan ni Sangrines sa publiko, pakamaayuhon nga magsunod kag ubrahon ang katungdanan sa tanan nga ginapatuman nga mga pagsulundan sang syudad bangud indi lango-lango sa subong nga panahon ang matapikan sang COVID-19.
