ILOILO CITY – Nagpasalig si President Ferdinand Marcos Jr. nga ipagwa na sa masunod nga duha ka semana ang resulta sang imbestigasyon sa gina-alegar kaangtanan sang pila ka mga police officers sa illegal drug trade.
Sa speech sang presidente sa 1st Joint National Peace and Order Council kag Regional Peace and Order Council Meeting sa Malacañang, ginpahayag niya nga indi mahimo nga magpatigayon sang tikang ang gobyerno batuk sa mga salawayon nga pulis base sa sala nga impormasyon.
Ginklaro sang presidente nga ang gobyerno ang wala nagakontra sa police force bangud nga ini ang kaupod sang admistrasyon sa pagpaluntad sang kalinong kag katawhay.
Ginhingyo man niya ang mga myembro sang pulis nga magkooperar sa administrasyon.
Apang suno sa iya, nagakadapat nga may yara sang mekanismo kun sa diin, ang mga nagpadala sa temptasyon ang dapat nga manabat agud nga indi mapugday ang sistema.
Nagpanawagan man ini sa mga council members nga i-address ang duha ka mga mayor nga problema sang pungsod sa peace and order: ang nagasaka nga kaso sang political violence kag ang kinagamo nga resulta sang kompetisyon sa tunga sang mga sindikato sang droga.
Dugang pa niya, ang gobyerno ang dapat nga mag-discuss may kaangtanan sa peace and order problem agud nga malikawan ang kinagamo kaangay sang nagakatabo sa iban nga mga pungsod.
Sang damlag lang, pila ka mga opisyal kag myembro sang Philippine National Police ang naangut sa P6.7-billion drug haul sa Manila.
Lakip na diri ang gin-dismiss nga si Police Master Sergeant Rodolfo Mayo Jr.
Una na nga ginpahayag sang ahensya nga wala sang may natabo nga tuyo nga pag-delay sa imbestigasyon sa kaso ni Mayo.
