ILOILO CITY – Nagalaum si Presidente Ferdinand Marcos, Jr. nga maganubo na ang presyo sang bugas subong nga Christmas season.
Suno kay Marcos, ang P20 nga presyo sang kada kilo sang bugas ang ginahandum kag tinutuyo sang iya administrasyon.
Isa sa mga ginahimo sang gobyerno suno sa iya amo ang pagpalapad pa sang scope sang Kadiwa.
Ini ang sang una ginapatuman sa lebel sang mga local government unit apang sa subong, isa na ini ka national program.
Nagalaum ang presidente nga maswertehan kag malab-ot ini sang gobyerno.
Una na nga ginpahayag ni Marcos nga malapit nalang kag malab-ot na sang Pilipinas ang P20 nga presyo sang kada kilo sang bugas.
Apang, madamo pa suno sa iya ang mga butang nga kinahanglan himuon agud nga malab-ot ini.
Ang pagpanubo sang presyo sang bugas ang campaign promise sang presidente.
Kahapon, ginbisita ni Marcos ang International Rice Research Institute headquarters sa Los Baños, Laguna kun sa diin, ginduso sini ang importansya sang pag-adopt sang mga polisa agud nga ma-modernize ang rice sector bilang kabahin sang maayo nga agri-food industry sa pungsod.
