ILOILO CITY- Magapatigayon sang imbestigasyon ang Police Regional Office 6 sa mga police officials nga nagpagwa sang mga pangalan sang mga local chief executives nga nakabaton sang death threat ukon pagpamahog sa kabuhi.
Ini ang kasunod sang ginpatigayon nga threat assessment sa mga local officials matapos ang natabo nga assassination kay Negros Oriental Governor Roel Degamo.
Sa interview sang Bombo Radyo Iloilo kay Police Brigadier General Leo Francisco, director saang Police Regional Office 6, iya ginpahayag nga matapos ang threat assessment, naggwa na ang pangalan nanday Iloilo 4th District Rep. Ferjenel “Ferj” Biron kag mga anak sini nga sanday Dumangas Mayor Braeden John “BJ” Biron kag Barotac Nuevo Mayor Bryant Paul “BP” Biron.
Magluwas diri, nakabaton man sang pagpamahog sa kabuhi si Dueñas Mayor Robert Martin Pama kag ang kaalyado sang pamilya Biron nga si Dumangas, Iloilo Vice Mayor Ronaldo “Onal” Golez.
Suno kay Francisco, nagpatigayon na sang re-evaluation ang Iloilo Police Provincial Office agud masiguro kun matuod nga may pagpamahog gid man sa kabuhi ang nasambit nga mga local officials.
Ginpahayag niya nga ang mga rason sa pagpamahog sa ila nga kabuhi amo ang politika kag negosyo.
Pananglitan nga mapamatud-an nga matuod,igapadala ang impormasyon sa Police Security and Protection Group nga amo ang nagahatag sang security personnel sa mga local officials.
