ILOILO – Nakahanda nga magbulig ang Police Regional Office 6 sa Department of Health sa tion nga i-tap sila may kaangtanan tracing sang mga Persons under monitoring kag Persons under investigation.
Sa interview sang Bombo Radyo kay Pol Lt Col Joem Malong, tagapamaba sang Police Regional Office 6 iya ginpahayag nga apisar wala pa sang request subong nagikan sa Department of Health, ginapreparar na nila ang mga personnel nga magabulig sa nasambit nga ahensya.
Suno kay Malong, ginpang-account na ang mga nurses kag personnels nga may background sa medical apisar indi lisensyado.
Dugang sang natungdan, sa subong may yara na sila sang na account nga masobra sa 30 ka mga pulis nga may medical background.
Sa tion nga kulangon, magapatigayon sila sang seminars kag trainings may kaangtanan sa pagtapna sang COVID-19.
Nahibaluan nga nakapagwa na sang memorandum ang Officer-in-Charge sang Regional Operations Divisions natuhoy sa security operations nga posible patigayunon sang mga kapulisan nga maga trave sa mga ipaidalom sa quarantine.
Sa subong, may yara na sang walo ka personal protective equipment ang Police Regional Office 6 kag magamit man sila sang “non contact thermal scanners” nga mahimo gamiton sa pagpatigayon sang mga lihok batok sa COVID-19.
Ginalauman nga madugangan pa ang mga nasambit nga equipments nga igahatag sang national headquarters.
Ginapa-athag man sa mga kapulisan ang basic advisory sa COVID-19, kung paano nila ini malikawan.
May yara man sang thermal scanner sa mga entrances and exits sang mga Campo kag sa mga local police stations.
