ILOILO – Ginkakas na sa pwesto sa Regional Intelligence Division sang Police Regional Office 6 (PRO 6) ang pulis nga nagtuyo nga magpalusot sang 29 ka karton sang makahulubog nga ilimnon sa checkpoint sa Brgy. Cabugao Sur, Sta. Barbara, Iloilo sang Mayo 8.
Sa interview sang Bombo Radyo kay Pol. Lt. Col. Gibert Gorero, acting spokesperson sang PRO 6, iya ginpahayag nga gindesignar na ang suspek nga si PSSg Paul Pingoy sa Regional Headquarters Support Unit (RHAO) epektibo sang Mayo 9.
Suno kay Gorero, nagapadayon man ang imbestigasyon para sa kaso-administratibo sa amo nga pulis, apang indi pa niya mapatpat ang detalye bangud mahimo ini maka-apekto sa proseso sang imbestigasyon.
Gindayaw man sang pamunuan ang Sta. Barbara Municipal Police Station sa madasig nga akto sa pag-aresto sa suspek kag sa kaupod sini nga sibilyan nga si Adolfo Patiam Jr.
May kaangtanan diri, ginkumpirma man ni Police Major Reymond Celoso, hepe sang Sta. Barbara Municipal Police Station, nga nakapiyansa na si Pinggoy amo man ang iya kaupod nga si Patiam.
Nahibaluan nga natabo ang tuyo nga pagpalusot sang ilimnon sang Mayo 8, sa diin ginpahayag nga nagserbe bilang driver sang salakyan si Pinggoy.
