Nagtuga sang madamo nga palamangkutanon sa pumuluyo sang Sitio Luyo, Barangay Poblacion, Carles, Iloilo ang pagpula sang porsyon sang baybay sa amo nga lugar.
Sa interview sang Bombo Radyo kay Margie Zambales, residente sang nasambit nga lugar, iya ginpahayag nga malangsa ang baho sang pula nga tubig sa diin masakit ini sa ilong.
Gilayon man nga nagpahanumdom ang mga barangay official sa mga pumuluyo nga indi magpaligo sa amo nga baybay samtang wala pa matumod ang gintunaan sang pagpula sang tubig.
Samtang suno naman sa alkalde sang Carles, Iloilo, ginalantaw nga posible bangud sa kemikal sa isa ka factory ukon halin sa barko ang pagpula sang baybay sa Sitio Luyo, Barangay Poblacion, Carles, Iloilo.
Sa interview sang Bombo Radyo kay Mayor Siegfredo Betita, iya ginpahayag nga gilayon naman nga ginkuhaan sang sample ang pula nga tubig sa baybay sang amo nga lugar agud dal-on sa Bureau of Fisheries and Aquatic Resources (BFAR).
Suno kay Betita, ang sample sang pula nga tubig ang i-examine sa laboratoryo sang BFAR agud matumod kun ano nga sahi sang kemikal ang nagsimpon sa baybay.
Samtang, nagpasalig naman ang BFAR nga ginatsikyar kag ginapa-imbestigaran na nila ang pagpula sang tubig sa baybay sang Sitio Luyo, Barangay Poblacion, Carles, Iloilo.
Sa interview sang Bombo Radyo kay Remia Aparri, Director sang BFAR Region VI, iya ginpahayag nga nagkuha man sang dugang nga sample sang tubig nga pula sa amo nga lugar ang ila nga mga staff.
Ginpasalig sang natungdan nga ipaidalom nila ini sa pila ka mga test agud matumod ang gintunaan sang pagpula sang tubig.
Ginpahayag ni Aparri nga hulaton nalang nila nga magwa ang resulta antes maghatag sang dugang nga pahayag natuhoy sa makatilingala nga pagpula sang tubig.
