Indi pag i-tolerar sang Iloilo Police Provincial Office (IPPO) ang paminatasan sang isa ka pulis nga ginapahayag nagpanakit sa 50 anyos nga lalaki sa Barangy P.D. Monfort South, Dumangas, Iloilo.
Ang biktima amo si Jonathan Bucana, residente sang Brgy. Calao, Dumangas, Iloilo.
Samtang ang pulis naman amo si Police Staff Sgt. Benjamin Gomez, assigned sa Intelligence Section sang Tigbauan Municipal Police Station.
Sa interview sang Bombo Radyo kay Police Colonel Gilbert Gorero, director sang IPPO, iya ginpahayag nga ginahulat nalang nila ang resulta sang imbestigasyon sang Dumangas Municipal Police Station natuhoy sa reklamo sang biktima nga napilasan matapos ginapahayag ginpistol-whip sang pulis nga si Gomez.
Suno kay Gorero, apisar wala pa sang resulta ang imbestigasyon, nagmando na siya nga i-relieve sa pwesto si Gomez bangud indi ini nagakabagay sa IPPO.
Ginpahayag ni Gorero, nga gina-engganyo man nila ang biktima nga magpasaka sang criminal charges batok kay Gomez.
Suno sa natungdan, sa tion nga mapamatud-an ang bayolasyon ni Gomez, dagdagan pa ini sang dugang nga sanction kag mahimo ini nga mapahalin na sa pwesto.
