ILOILO CITY – Gin-athag ni Iloilo 1st District Rep. Janette Garin nga wala siya sang ihabalo may kaangtanan sa repatriation sang Overseas Filipino Workers nga nagpauli sa Panay.
Ini matapos nga isa si Garin sa mga namitlangan ni Iloilo City Mayor Jerry Treñas nga nagpatigayon sang repatriation apang wala man direkta nga gintudlo sang alkalde nga ang mamalidha gid ang may yara sang kahilabtanan tuhoy diri.
Sa interview sang Bombo Radyo kay Garin, iya ginpahayag nga handa siya nga maghatag sang ano man nga bulig para sa mga na stranded nga Overseas Filipino Workers.
Sa pihak sini, ginpahayag ni Garin nga wala siya nahatagan sang kahigayunan nga makapalab-ot sang bulig bangud una, wala siya napahibalo may kaangtanan sa repatriation.
Suno kay Garin, makapila naman ka bes nga nagtinguha siya nga makig-angot kag Iloilo Governor Arthur Defensor Jr., agud mabuligan ang mga OFW apang wala ini nahatagan sang igtalupangod sang gobernador.
Ginpahayag ni Garin nga posible nga may yara lang sang indi pag-intindihanay sa tunga niya, Iloilo City Mayor Jerry Treñas kag Defensor rason nga namitlangan ang iya pangalan sa mga ginapahayag nagpatigayon sang repatriation.
Samtang, ginahulat na lang sang mamalidha ang go signal sang Department of Health agud masugudan na ang paggamit sang automatic extraction machine nga isa ka makina nga mahimo makapaguwa sang resulta sang COVID-19 sa masobra 1,000 sa isa ka adlaw.
Sa pagpaathag ni Garin, paagi sa nasambit nga makina, mas mapadasig ang pag test sa mga pasyente kag mapadasig man ang pagpaguwa sang resulta sini.
