ILOILO CITY – Maswerte nga wala napilasan si Florida Gov. Ron DeSantis matapos nga nadisgrasya ang ginasakyan nila sang iya team sa Tennessee.
Suno sa iya press secretary nga si Bryan Griffin, padulong sa isa ka event sa Chattanooga, Tennessee ang gobernador sang natabo ang aksidente.
Ang 44 anyos nga Republican presidential contender ang naka-schedule nga magpasakup sa isa ka fundraiser.
Wala na naghatag pa sang dugang nga detalye ang campaign team ni DeSantis may kaangtanan sa aksidente kaangay sa kun paano natabo kag pila ka tawo ukon salakyan ang naulamid.
Suno sa Chattanooga Police Department, isa ka staff ang naka-agum sang menor nga pilas apang nagpadayon sa gihapon sa event.
Pahayag pa sang police department, ang four-vehicle motorcade ni DeSantis ang naangut sa crash nga natabo sa I-75 South sa idalom lang sang East Brainerd Road.
Hinali lamang nga nagpreno ang lead vehicle nga nagresulta sa rear-end collision sa iban pa nga mga salakyan.
Ang tanan nga salakyan nga involved ang mga government vehicles nga nagakarga sang team ni DeSantis para sa isa ka scheduled event.
