Nagpasakop liwat ang Russia sa agreement nga naga-garantiya sang hilway nga pagpalayag sang mga barko nga nagakarga sang grain exports halin sa Ukraine.
Ini nga lihok ang ginalantaw nagapahagan-hagan sang mga kahangaw sang food supply para sa bilog nga kalibutan nga nabuhi sang nag-atras ang Moscow sa pagpartisipar sa amo man nga agreement sang nagligad nga semana.
Kun matandaan, gin-rason sang Russia ang drone attacks sa syudad sang Sevastopol sang Crimea nga amo ang ila rason sa pag-isol sa kasugtanan.
Ukraine ang ginbasol sang Russia sa amo nga pagpang-atake; apang wala nag-ako ang Ukraine kag tubtub subong indi pa maathag kun daw ano kadaku nga halit ang natuga sa naval vessels sang Russia.
Apang subong, mismo ang Russian Ministry of Defense ang nag-anunsyo nga ma-intra sila liwat sa agreement.
Sa idalom sa amo nga agreement, ginapasalig sang Russia nga indi sini pag-atakehon ang mga barko nga nagalabay sa humanitarian corridor sa Black Sea nga nagakarga sang Ukrainian grain, abono, kag iban pa nga pagkaon.
Sa idalom pa sang amo nga kasugtanan, gina-inspect ang tanan nga vessels nga nagapakadto-pakari sa pantalan sang Ukraine.
Ang naga-monitor amo ang international teams nga ginabug-usan sang mga opisyal halin sa Russia, Ukraine, Turkey, kag United Nations.
Kritikal ang papel sang grain supply halin sa Ukraine. Suno sa United Nations, naga-suplay ang Ukraine sang 45 million ka tonelada sang trigo kada tuig.
Ikalima ini sa bug-os nga kalibutan pag-abot sa top global exporters sang barley, corn, and wheat.
Ini man ang biggest exporter sang sunflower oil nga katumbas sang 46% sang exports sa kalibutan.
