Estable na ang sitwasyon sang mga banwa sa probinsya sang Iloilo matapos naglaslas ang bagyo Dante.
Sa interview naman sang Bombo Radyo kay Dr. Jerry Bionat, Provincial Disaster Risk Reduction and Management Officer (PDRRMO), iya ginpahayag nga sa mga probinsya nga nakaeksperyensya sang mga pagbaha, madasig man nga nagsubside ukon nagtahaw ang tubig.
Suno kay Bionat, sa banwa sang Balasan, Iloilo, nakapauli na sa ila nga mga balay ang 169 ka pamilya sa diin katumbas sini ang 527 ka mga indibidwal nga mga ginpang-evacuate sa Balasan Civic Center.
Magluwas sa banwa sang Balasan kag Batad, Iloilo nga nakaeksperyensya sang pagtaas sang tubig baha, wala naman sang may narekord ang PDRRMO nga may totally damage nga mga pamalay kag imprastraktura sa iban pa nga banwa sang probinsya sang Iloilo.
Samtang, ginpahayag ni Bionat nga sa banwa naman sang Batad, Iloilo, nakapauli na man ang duha ka ginapatihan manugpangisda nga mag-utod nga gin-anod sa baybay sang Daanbantayan, Cebu.
Ang duha ka lalaki ang lunsay residente sang Barangay Tanao, Batad, Iloilo.
Posible suno kay Bionat nga nagapangisda ang mag-utod sang gin-anod ang ila sakayang pandagat bangud sang mabaskog nga pagbalod sa tunga sang lawod.
Sa bulig sang Philippine Coast Guard sa Cebu, natigayon nga napapauli ang duha ka lalaki nga wala man nakaangkon sang pilas matapos gin-anod.
Sa subong pahayag ni Bionat, wala naman nakit-an ang sakayang pandagat sang mag-utod.
