NORTH KOREA – Nakit-an sa isa ka resort town sa North Korea ang gina-alegar special train nga ginagamit ni North Korean leader Kim Jong Un.
Ini sa pihak sang mga balita ng yara sa kritikal nga kondisyon si Kim matapos ang iya nga operasyon.
Base sa ginapagwa nga satellite images sang monitoring project 38 North, ginapahayag nga naka-park ang train sa leadership station sa Wonsan humalin sang Abril 21 tubtob 23.
Nahibaluan nga magluwas sa pamilya sang North Korean leader wala na sang iban pa nga nagagamit sang nasambit nga station.
Madumduman nga una na nga naggwa ang balita sang nakaligad lang nga semana nga nagapaayo na si Kim matapos magpaidalom sa cardiovascular procedure sang Abril 12.
Nangin mainit nga topiko man ang indi pagtambong ni Kim sa selebrasyon sang kaadlawan sang iya lolo nga si Kim Il Sung sang Abril 15.
Samtang nagapadala na sang team ang China sa North Korea nga ginalakipan sang mga medical experts agud mahibaluan ang matuod nga kondisyon sang ikaayong lawas ni Kim.
