ILOILO CITY – Nalakip si suspended Negros Oriental Representative Arnolfo “Arnie” Teves Jr. sa mga ginakabig nga mastermind sa pagpatay kay Negros Oriental Governor Roel Degamo kag sa walo ka iban pa.
Suno kay Justice Secretary Jesus Crispin Remulla, posible nga may yara sang duha tubtob tatlo ka mga masterminds sa krimen kag sila ang mahimo nga ma-contact
Ginpahayag man ni Remulla nga si former Negros Oriental governor Pryde Henry Teves, ang manghud sang suspended congressman, ang mahimo nga madalahig man sa kaso kasunod sang ginpatigayon nga raid sa iya sugar mill.
Madamo nga high-powered firearms, ammunition, kag explosives ang na-recover sa 50-hectare sang anay gobernador sa Barangay Caranoche, Santa Catalina.
Dugang pa niya, ang mga arestado nga suspek sa pagpatay kay Degamo ang nagpahayag nga nakita nila ang paghimo sang mga explosives nga na-recover sa raid.
Kasunod sini, si Pryde Henry ang ipaidalom sa preliminary investigation kag suno kay Remulla, ang tanan nga kinamatarong sang mga naulamid sa kaso ang respetuhon sang gobyerno lakip na ang ila kinamatarong sa due process.
Samtang, ang magulang nga Teves ang wala pa sa gihapon nakabalik sa Pilipinas matapos nga gin-suspend sang 60 ka adlaw sang House of Representatives bangud sa iya padayon nga pag-absent sa trabaho apisar nga nag-expire na ang iya travel authority sang Marso 9.
Suno sa kampo ni Teves, ang pamahog sa iya kabuhi kag seguridad ang rason kun ngaa nga nagapamalibad nga magpauli sa pungsod.
Apang, mismo si Presidente Ferdinand Marcos, Jr. ang nagpahayag nga base sa intelligence reports, wala sang pamahog sa kabuhi ni Teves kag gin-enganyo niya nga magpauli kag atubang ang mga ginahaboy batuk sa iya.
Magluwas nga naangut sa pagpatay kay Degamo, si Rep. Teves ang nagapangatubang man sang murder bangud sa pagpatay kay former Negros Oriental Board Member Miguel Dungog sang 2019, kag ang mga kaso nga illegal possession of firearms.
Suno kay Philippine National Police Criminal Investigation and Detection Group chief legal officer P/Col. Thomas Valmonte, si Pryde Henry ang magapangatubang sang kaso bangud sang illegal possession of firearms and explosives.
