Nagpadala na ang Sweden sang diving vessel agud imbestigaran ang area sang Nord Stream pipelines kun sa diin ang eruption sa Baltic Sea ang nakatuga sang leakage sa sulod na sang pila ka adlaw.
Ini nga insidente ang nakatuga na sang panibag-o nga tensyon sa energy crisis sa bilog nga Europa.
Ginpahayag nga submarine rescue ship ang ginpadala sa site sang leaks kag amo subong ang nagasuporta sa Swedish coast guard nga amo ang nagapanguna sa imbestigasyon.
Kun madumduman, sang nagligad nga semana, ang undersea blasts nga naga-involve sang hundred pounds sang explosives ang nakahalit sa Nord Stream 1 kag 2 pipelines sa southern Sweden kag Denmark kag amo ang nangin rason sang methane leaks sa international waters sa Baltic Sea.
Suno sa European leaders, sabotahe ang natabo apang wala ginhingadlan kun sin-o ang may kahimuan.
Nagpahayag naman ang Russia nga ang West ang responsable sa explosion.
Ini nga pipelines (nga nagalawig halin sa Russia pa- Germany) amo ang sentro sang growing gas supply crisis sa Europe nga kabahin gihapon sang epekto sang pag-atake sang Russia sa Ukraine.
