ILOILO CITY – Isa ang syudad sang Iloilo sa ginpasidunggan bilang Best Disaster Risk Reduction and Management Council sa 21st GAWAD KALASAG National Awarding Ceremony sa Philippine International Convention Center sa Pasay City, Metro Manila.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang syudad sang Iloilo ang top 3 finalist sa Best Disaster Risk Reduction and Management Council sa Highly Urbanized City Category kaupod ang Angeles City kag Quezon City nga amo ang nagpanguna.
Suno kay Treñas, nakabaton ang Iloilo City Government sang Gawad KALASAG Seal, plaque of recognition kag cash prize nga P200,000.
Ginpahayag ni Treñas nga tuman ang iya pagkalipay bangud nga nagbunga ang paghimakas sang tanan nga nagabug-os sa City Disaster Risk Reduction and Management Council.
Bangud sini, ginpahayag sang alkalde nga iya tutukan ang pagpatukod kag pagpasangkad sang command center.
