ILOILO CITY – Ginkumpirma sang Iloilo City Police Office (ICPO) nga ila personnel ang tag-iya sang salakyan nga amo ang ginbutangan sang gamit sang isa ka lalaki nga ginapahayag gin-abduct sa dalan Rizal, Iloilo City Proper sang Martes, Marso 3.
Sa interview sang Bombo Radyo kay PCapt Shella Mae Sangrines, tagpamaba sang ICPO, iya ginpahayag nga ang amo nga personnel amo si PCpl Steven Tubola.
Indi pa makumpirma ni Sangrines kun sa ano nga unit nadesignar si Tubola.
Pahayag pa ni Sangrines, wala sang may nareport nga operasyon nga ginpatigayon sang ICPO sang Marso 3, apang kun may yara gid man, nagadapat lang suno sa iya nga may yara kuntani sang koordinasyon nga ginhimo.
Apisar wala pa natapos ang imbestigasyon sang ginapahayag abduction nga nagresulta sa buybust operation, nagpasalig ang ICPO nga manabat gid ang responsable sa amo nga kontrobersiya.
Ginpasalig man sang ICPO nga mangin hilway sa katalagman ang complainant kag mga saksi sa tion nga maghatag ang mga ini sang ila pahayag kag magkooperar sa imbestigasyon.
