Teodoro, ginkondenar ang AI video sang China nga naggamit sang amo sa paglaragway sa mga Pinoy

Ginkondenar ni Department of National Defense (DND) Secretary Gilbert Teodoro ang AI-generated video sang China nga nagalaragway sa Pilipinas bilang isa ka “amo” may kaangtanan sa isyu sang West Philippine Sea.

Ini nga video ang ginpaguwa sa state-run media nga China Daily kag nakit-an diri sa Pilipinas matapos nga gin-repost ni Philippine Coast Guard Spokesperson for the West Philippine Sea Rear Admiral Jay Tarriela.

Sa video, ginpakita ang isa ka amo nga may suksok nga salakot nga nagasimbolo sa Pilipinas kag ginpakita nga ginakontrol sang Estados Unidos kag Japan agud ipatuman kag iduso ang 2016 arbitral ruling.

Ginpakita man sang ulihi nga gina-water cannon sang China Coast Guard ang amo.

Suno kay Teodoro, ginapakita sang video kun paano ginatan-aw sang Chinese Communist apparatus ang mga Pilipino.

Pahayag sang tiglikom, ang pagtamay sa 2016 Arbitral Award kag ang pagdayaw sa bayolente nga mga tikang batok sa mga Pilipino nagapakita sang moral and intellectual bankruptcy sang propaganda machine sang China.

“This mockery of the lawful 2016 arbitral award and the video’s glorification of violence against the Filipino people and soldiers expose the moral and intellectual bankruptcy of China’s propaganda machine,” suno sa statement sang tiglikom.

Suno pa sa iya, mahuyang na ang China gani nga ginapaagi na lang sa racism, pagpamahog, kag kaugot ang ila propaganda bangud nga indi sila makapakigbato nga may rason, may ebidensya, ukon may layi.

“Such contemptible propaganda is a disgrace to any State that claims to exercise responsible regional leadership. It reveals the weakness of a government that resorts to racism, threats, and manufactured hatred because it has utterly failed to defend its ridiculous claims through reason, evidence, or law,” dugang sang Defense Secretary.

“This latest act of dehumanization further reveals them as neither a secure and confident actor nor a trustworthy neighbor,” suno pa kay Teodoro.

Dugang niya: “Pilipinas, huwag magpalinlang! Ang nalilinlang ay nasisiil.”

Samtang, nagpahayag si Rear Admiral Jay Tarriela nga nagreklamo anay ang China sang naghimo siya sang caricature sang ila lider, apang subong sila mismo ang nagpaguwa sang video nga nagapakamalaot kag nagatamay sa mga Pilipino.

Ginhangkat man ni Tarriela ang mga senador nga anay nagsuporta sa China sa isyu sang caricature nga kondenahon man ang amo nga video.

“Naaalala ko tuloy ang ilang senador na nagsabing kailangan ko raw humingi ng tawad sa China. Ngayon kaya, sasabihin din ba nilang ang China naman ang dapat humingi ng tawad — dahil tayong mga Pilipino mismo ang binababoy ng video na ito?,” dugang sini.

Pahayag pa ni Tarriela: “Mga kababayang Pilipino hindi po tayo UNGGOY, at huwag tayong pumayag na gawing UNGGOY! Ang mga hayop lamang ang mga nakakagawa ng ganitong pagturing sa kapwa tao at mas masahol pa sa hayop ang hindi marunong sumunod sa international law!”

Sa separado nga pahayag, nagpnawagan ang Department of Foreign Affairs ukon DFA nga kukason gilayon sa internet ang kontrobersyal nga video.

Suno sa DFA, naglapaw na sa normal nga diskurso-pulitikal ang China Daily bangud naggamit ini sang indi makatawo kag racist nga paglaragway sa mga Pilipino.

Ginpabutyag sang DFA nga ang indi paghangpanay sa legal kag pulitikal nga mga isyu indi dapat mangin kabangdanan sa paggamit sang amo sini nga mga laragway nga nagadugang lamang sang pagkadula sang pagsalig sa tunga sang Pilipinas kag China.

Natabo ang pag-post sang China Daily sang amo nga kontrobersyal nga video pila ka adlaw lang matapos ang ika-10 nga anibersaryo sang he 2016 arbitral ruling nga isa ka landmark legal victory sang Pilipinas batok sa China kaangot sa isyu sa West Philippine Sea.