ILOILO CITY-Ginbawian gid sang kabuhi ang isa ka tigulang matapos ginlampusan gamit ang paklang sang lubi.
Ang biktima amo si Samson Sala, 72, samtang ang suspek amo si Randy Gil,lunsay mga residente sang Brgy. Wari-wari, New Lucena, Iloilo kun sa diin man natabo ang insidente.
Sa interview sang Bombo Radyo kay Police Master Sgt. Carlito Berte, imbestigador sang New Lucena Municipal Police Station, iya ginpahayag nga pauli na ang suspek sakay sa iya tricycle sang naglabay ini sa payag-payag sang biktima.
Nagpundo ang suspek sang nakit-an niya nga nagbangga ang tigulang kag may ginauyatan nga kahoy sang ipil-ipil,kag didto na nagkomprontahanay kaag nagpukutay ang duha.
Nagkuha sang paklang sang lubi ang suspek kag ginlampusan sang makapila ka beses ang tigulang.
Bangud sa edad,wala na nakabato pa ang biktima tubtob madulaan sang pangalibutan.
Gindala pa ini sa ospital apang wala na natabangan pa.
Ginpahayag nga may daan na nga hiligut-anon ang duha.
Arestado naman ang suspek kag natalana nga pasakaan sang kaso nga homicide.
