ILOILO CITY – Kinse porsyento ang away sang syudad sang Iloilo batok sa coronavirus disease 2019 (COVID-19), apang 85 porsyento ang away sa pagkaon.
Ini ang pahayag ni Iloilo City Mayor Jerry Treñas samtang nagahingyo nga hatagan sang prayoridad ang suplay sang pagkaon sa syudad.
Suno kay Treñas, ginabutang sa fast lane ang food and medicine supplies sa Iloilo — buot silingon, wala na sang madamo pa nga requirements sa tion nga gina-deliver ang ini nga suplay sa nanuhay-tuhay nga mga barangay.
Nagpahayag man si Treñas sang pagkadismaya sa mga lugar, kaangay sang isa ka munisipalidad sa probinsya sang Capiz, sa diin madamo pa suno sa iya sang ‘out of this world requirements’ kaangay sang food pass nagikan sa Department of Trade and Industry (DTI) kag certification nga nagapamatuod nga negatibo sa COVID-19 ang sin-o man nga nagadul-ong sang pagkaon.
Kun amo sini ang proseso suno sa natungdan, mahimo nga wala na sang sarang makaon ang mga pumuluyo.
Nahibaluan nga sa subong, activated na ang Community Kitchens sa 73 ka kabaranggayan sa syudad kag plano nga dugangan ini sang 240 pa ka community kitchens subong nga adlaw, Marso 24.
Padayon man nga gina-deliver sang Iloilo City Government ang mga pagkaon sa frontliners.
