ILOILO CITY- Ginpresentar ni Vice Mayor Jeffrey Ganzon ang mga rekomendasyon sa ginpatigayon nga imbestigasyon sang konseho sa isyu sa anomaliya sa Iloilo City Government Employees Multi- Purpose Cooperative.
Yari ang mga rekomendasyon: pagpasar sang resolusyon nga nagaengganyo sa ad hoc comittee nga i request ang Cooperative Development Authority nga magpatigayon sang imbestigasyon sa ginaalegar anomaliya nga naga- involve sa mga Board of Directors; pagpasar sang resolusyon nga nagarekomendar sa ad hoc committee members nga i-revisit ang by-laws sang kooperatiba; pag-review sang tripartite agreement sa tunga sang Iloilo City Government, Iloilo City Government Employees Multi- Purpose Cooperative kag Land Bank of the Philippines.
Kasunod sang pagpresentar ni Ganzon, nagwangal naman si Councilor Romel Duron kun ngaa wala nalakip sa mga rekomendasyon ang pangalan sang mga Board of Directors kag myembro nga may dalagko nga utang sa kooperatiba.
Nagsabat naman ni Ganzon nga kuntani nagpasa si Duron sang rekomendasyon.
Nagbalos naman si Duron nga nagpasa siya sang rekomendasyon apang wala ginbaton ni Ganzon.
Matandaan nga sang nagligad, nagpatigayon si Duron sang privilege speech kun sa diin ginpanglawag niya ang mga pangalan sang mga myembro nga may pinakadako nga utang sa kooperatiba.
