Magasugod na subong nga Lunes, Hulyo 4, ang voter registration activities sa Commission on Elections (Comelec).
Sandig sa gin-aprubahan sang en banc, magalawig ang voter registration tubtub sa Hulyo 23.
Sa interview sang Bombo Radyo kay Mr. Jonathan Sayno, Election Assistant II sa Iloilo City Comelec, iya ginpahayag nga duha ka klase ang registration: una, ang registration para sa SK elections, kag ang ikaduha amo ang regular voter registration para sa barangay elections.
Para sa SK elections, ginalantaw sang Iloilo City Comelec nga may 30,000 ka mga maga-register sa bilog nga syudad.
Pwede nga makaboto sa SK elections ang naga-edad 15 tubtob 30-anyos.
18-24 anyos naman dapat ang edad sang makapadalagan sa SK elections.
Sa barangay elections, ang mga makaboto lang amo ang nagaedad 18-anyos pasaka.
Sa mga magapa-rehistro nga may limitado pa nga ID, mahimo makadala sang photocopy sang birth certificate kag photocopies sang National ID.
Sa mga regular voters, batunon ang bisan ano nga sahi sang valid ID.
Magluwas sa registration, iga-cater man sang Comelec ang updating of records, transfer, change/corrections of entries, reactivation or reinstatement, kag inclusion sang registration records.
Mahimo nga ma-download ang forms sa website nga www.comelec.gov.ph.
Sa syudad sang Iloilo, tatlo ang venues nga mahimo padulungan sang magaparehistro:
Hulyo 4- Hulyo 9: Iloilo City Comelec Office sa Iloilo City Proper.
Hulyo 11- 16: SM City, Mandurriao
Hulyo 18 – 23: Festive Walk Mall sa Megaworld, Mandurriao.
Wala sang registration kada Domingo.
Tandaan man nga bukas ang registration halin las-8 sang aga tubtob las-5 sang hapon.
