Nagpanawagan ang World Health Organization (WHO) sa mga lalaki nga nagapakighilawas man sa kaangay nga lalaki nga limitahan ang ila nga sexual partners.
Ini ang sa tunga sang nakit-an nga pagdamo sang kaso sang monkeypox, ang balatian nga na-deklarar na sang nagligad nga semana bilang global health emergency.
Una na nga ginpahayag sang WHO nga ang pinakaapektado sang sini nga virus amo ang mga lalaki nga nagapakighilawas man sa lalaki.
Suno kay WHO chief Tedros Adhanom Ghebreyesus, ang pinaka-maayo nga paagi agud malikawan ang infection amo nga buhinan ang risgo sang exposure.
Lakip man sa ginpanugyan sang WHO amo ang pag-bayluhanay sang contact details sa bag-o nga mga partner agud nga ma-follow up pananglitan nga may matabo gid man nga infection.
Suno kay Tedros, masobra na sa 18,000 cases sang monkeypox ang na-report sa WHO halin sa 78 ka mga pungsod, 70 percent sang cases ang na-report sa Europe kag 25 percent sa Americas.
Lima na ang patay halin sang outbreak sang Mayo, kag yara sa 10% sa infected ang ginpangdala gid sa ospital.
98% sang mga kaso ang natabo sa mga lalaki nga nakapakighilawas sa kaangay nga lalaki.
May pagtuon man nga nabalhag sa New England Journal of Medicine sang nagligad nga semana nga nagapakita nga 98 percent sang infected people amo ang gay or bisexual men, kag 95 percent sang cases ang nalaton paagi sa sexual activity.
Apisar sini nga mga pagtuon, may mga eksperto man nga nagpahayag nga indi ma-label nga sexually transmitted infection (STI) ini nga balatian. ##
