ILOILO – Nagalaum ang local government unit (LGU) sang Zarraga nga indi na madugangan pa ang kaso sang coronavirus disease 2019 (COVID-19) sa bug-os nga banwa partikular na sa Hacienda Fe Subdivision Phase 1-A sa Barangay Sambag, Zarraga, Iloilo.
Ini matapos ginkumpirma ni Vice Mayor Jofel Soldevilla nga nag-negatibo na sa COVID-19 ang personnel sang Bureau of Jail Management and Penology (BJMP) nga naga-istar sa lugar.
Sa interview sang Bombo Radyo kay Soldevilla, iya ginpahayag nga ipadalom lang sa gihapon sa 14 ka adlaw nga quarantine ang amo nga personnel agud masigurado ang ikaayong lawas.
Ang una naman na-identify nga mga naka-close contact sang amo nga pasyente ang mahimo na makabalik sa ila barangay sandig man sa advisory sang Municipal Health Unit.
Suno kay Soldevilla, daw ‘nahaw-asan’ ang mga pumuluyo bangud makabalik na sila sa ila tagsa ka rutina.
Sa pihak sini, gin-abisuhan sang bise-alkalde ang mga pumuluyo nga indi magpakampante kag tumanon sa gihapon ang quarantine measures ilabi na bangud nagapabilin nga yara sa enhanced community quarantine (ECQ) ang probinsya sang Iloilo.
May exit plan naman nga ginahanda si Zarraga Municipal Mayor John H. Tarrosa apang suno kay Soldevilla, ang tanan nga plano ang sandig man sa ipapanaug nga direktiba sang Iloilo Provincial Government.
May “special features” lang suno kay Soldevilla santo sa labi nga ginakinahanglan sang banwa.
Nahibaluan nga ginalauman nga matapos na ang pagpatuman sang ECQ sa Iloilo sa Mayo 15.
