ILOILO – Nagsungka sa otoridad sa Poblacion, Culasi, Antique ang 11 ka mga miyembro sang New People’s Army.
Ang amo nga mga rebelde amo sanday Ka Paner, squad leader sang Igabon Platoon; Anton ukon Minmin ukon Dario, squad leader sang Napoleon Tumagtang Command Southern Front; Bobet ukon Dodoy, Tams, Boy, Nini ukon Omar, Boy ukon Ontor ukon Ronot, JR, Amar, Jojo kag Jan-Jan nga lunsay miyembro sang Tumagtang Command Southern and Northern Front.
Sa interview sang Bombo Radyo kay PBGen. Rene Pamuspusan, director sang Police Regional Office VI, iya ginpahayag nga mga lider kag miyembro sang Panay Regional Committee nga naga-operate sa Panay kag Aklan ang amo nga mga surrenderees.
Ginsungka man sang mga anay miyembro sang rebelde nga grupo ang ila armas kag granada.
Suno kay Pamuspusan, nabudlayan na ang mga rebelde sa ila pagpalagyo sa kabukiran kag nagapati man sila sa kampanya sang gobyerno.
Ginaproseso pa sa subong kun kwalipikado pa sila sa E-Clip ukon Enhanced Comprehensive Local Integration Program.
