ILOILO CITY – Naghingyo sang pasaylo si Public Safety and Transportation Management Office head Jeck Conlu sa wala niya pagsabat sa tawag ni Iloilo City Councilor Jojo Javellana, may kaangtanan sa pagdakop sang traffic auxiliary sa isa ka Barangay Tanod nga nagdul-ong sa isa ka pasyente sakay sa Barangay Tricycle Patrol.
Sa interview sang Bombo Radyo kay Conlu, iya ginpahayag nga yara siya sa tunga sang pagsinapol kaupod si Iloilo City Mayor Jerry Treñas sang nagtawag ang konsehal gani wala niya ini gilayon nga nasabat.
Suno kay Conlu matapos ang pagsinapol gilayon man niya nga gintawgan si Javellana apang ini naman ang wala nagsabat.
Ginathag naman ni Conlu nga narelieve na ang traffic auxiliary nga nagdakop sa Barangay Tanod nga sakay sang Barangay Tricycle Patrol kag nag agi sa National highway bangud sa ‘misjudgement’ niya sa nasambit nga hitabo.
Gin-ako man sang natungdan, nga indi malikawan nga may yara sang kapaslawan ang ila nga personnel.
Dugang pa ni Conlu, handa man sya nga makig-angot kay Javellana agud husayon ang indi pag intindihanay sa tunga nila kag personal man nga athagon ang iya bahin sa konsehal.
Samtang, ginpanginwala naman ni Iloilo City Councilor Jojo Javellana nga natandog ang iya bugal bangud sa wala pagsabat sa iya ini Conlu.
Sa interview sang Bombo Radyo kay Javellana, iya ginpahayag nga paghangop kag konsiderasyon lang para sa mga barangay official ang iya ginapangayo kay Conlu.
Suno kay Javellana, luyag man lang niya protektahan ang mga opisyal sang barangay sa syudad sang Iloilo.
Dugang sang natungdan, handa man sya nga makig istorya kay Conlu agud kaayuhon ang indi pag intindihanay sa tunga nila.
