ILOILO CITY- Narescue sang Philippine Coast Guard ang 32- anyos nga lalaki nga sakay sang nagkapan nga motorbanca sa kalalawran samtang papauli na kuntani sa San Lorenzo, Guimaras halin sa Negros Occidental.
Kahapon sang udto sang nagtext sa iya pamilya si Rudy June Patriarca nga amat-amat nga nagakapan ang iya motorbanca kag sang ginsugat ini sang iya pamilya, wala na ini makit-an rason nga gilayon nga ginpatigayon ang search and rescue operation.
Sa interview sang Bombo Radyo kayLt. Junior Grade Bryan Ignacio, station commander sang Philippine Coast Guard- Guimaras, iya ginpahayag nga alas-otso kaina sang aga sang nakit-an ini sang katapo sang Philippine Coast Guard sa tunga sang lawod nga sakop sang San Lorenzo, Guimaras.
Suno kay Ignacio, kapin 24 oras man nga nagakapakapa na lang ang biktima bangud nga naglugdang gid ang iya motorbanca.
Dako naman ang pagpasalamat sang pamilya bangud buhi pa nga nakapauli ang ila himata.
