Nagsabat ang punong barangay sang Granada, Isla de Gigantes, Carles, Iloilo angot sa isyu nga ginhaboy sa iya nga nagaadopt ini sang mga pangayaw gikan sa Masbate kag nagapinagusto sa pagkuha sang scallops sa kadagatan sang Carles agud dal-on man sa Masbate.
Sa interview sang Bombo Radyo kay Punong Barangay Roberto Pestaño, iya gin-ako nga naga-adoptar gid man sila sang mga pangayaw apang suno sa iya, ini man ang ginahimo sang iban nga barangay.
Suno kay Pestaño, mangin sa Brgy. Asluman sa amo nga isla, madamo man sang mga pangayaw nga taga-Masbate nga nagapangkuha sang scallops.
Nahibaluan nga ginreklamo ni Punong Barangay Abelardo Montibon sang Brgy. Asluman si Punong Brgy. Pestaño bangod sa ginaalegar paglapas sini sa ordinansa sang banwa nga nagadumili sang pagpasulod sang mga pangayaw agud mangkuha sang scallops.
Nasaad man sa ordinansa nga ang scallops nga mahimo lang kuhaon amo ang nagalapad sang duha ka pulgada kag ang mga mas magagmay diri ang indi dapat pagtandugon kag suno kay Montibon, ginalapas ini sang mga tinawo ni Pestaño.
Apang suno kay Pestaño,ang mga magagmay nga scallops ang ginapangkuha man gani sang mga taga Brgy. Asluman kag ginadala sa Granada.
Nanindugan naman si Pestaño nga legal ang iya operasyon bangud kompleto siya sa dokumento kag permit halin sa alkalde sang banwa.
