Liwat na naman nga magapatuman sang border control ang syudad sang Iloilo bilang dugang nga pagpanghanda sa mas makalalaton nga COVID-19 Delta Variant.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga sa ginpatigayon nga consultation sa mga private sectors sa Iloilo City, nadesisyunan nga ibalik ang mga border checkpoints umpisa bwas, Agosto 24 sa diin essential personnel ukon authorized persons outside residence (APOR) lang ang pahanugutan nga magsulod sa syudad.
Ang border control ang untaton lang kada Huwebes para sa patigayunon nga vaccination rollout sa diin buksan ang tanan nga vaccination sites para sa indi residente sang syudad.
Ginmanduan naman ang mga barangay official nga mas istriktuhan ang pagpatuman sang minimum public health standards.
Gin-athag ni Conlu nga ini nga mga tikang ang kasunod sang ginakabig na nga ‘alarming’ nga pagsaka sang kaso sang COVID-19 sa syudad kadungan sang pamahog nga dala sang bag-o kag mas makalalaton nga mga variant sang virus.
