Naga-plano na si Iloilo City Mayor Jerry Treñas nga pasakaan sang kaso ang tanan nga empleyado sang Philippine Health Insurance Corporation (PhilHealth) Region VI bangud sa indi pagbayad sang ahensya sa halos P1 Billion nga utang sa mga ospital kag Uswag Iloilo Molecular Laboratory sang syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginmanduan na niya ang City Legal Office nga magpasaka sang kaso administratibo kag kriminal batok sa PhilHealth sa Blue Ribbon Committee kag Office of the Ombudsman.
Magluwas diri, magapasaka man ang syudad sang kaso nga paglapas sa Anti-Red Tape Act bangud sa kapaslawan sang ahensya nga magbayad sa hospital claims.
Suno sa alkalde, ang indi pagbayad sang PhilHealth sa mga ospital ang posible magresulta sa indi na pagbaton sang mga ospital sang mga COVID-19 patients bangud sa kakulangan sang mga intensive care unit (ICU) beds.
