Gintsikyar sang Department of Environment and Natural Resources (DENR) ang bag-o nga crematorium sang Gegato-Abecia Funeral Homes & Crematory Incorporated sa Barangay Balabago Jaro, Iloilo City.
Nahibaluan nga ang nasambit nga crematorium ang naga-isahanon nga punerarya nga ginhatagan sang permit sang DENR agud mag-cremate sa mga napatay bangud sa COVID-19.
Sa interview sang Bombo Radyo kay Fely Gegato Abecia, tag-iya sang nasambit nga punerarya, iya ginpahayag nga personal nga nagpadulong ang abogado sang DENR Region VI nga si Atty. Arjunn Calvo sa ila punerarya.
Suno kay Abecia, matapos ang evaluation sang DENR, pormal na sila nga nag-umpisa sang ila operasyon.
Ginpahayag sang natungdan nga ang bag-o nga crematory machine ang sarang nga maka-akomodar sang masobra 40 ka mga bangkay sa sulod sang isa ka adlaw.
Gin-athag man sang natungdan nga kompleto ang ila nga papeles kaangay sang Barangay Clearance kag Zoning Permit.
Dugang pa niya, milyo ang presyo sang ila bag-o nga crematory machine kag wala sang kamatuoran ang nagalapta nga balita nga bilyon ang presyo sini.
