ILOILO CITY – Ginalantaw sang syudad sang Iloilo nga ipakay-o ang Fort San Pedro sa City Proper.
Ini matapos man nga nagpadulong sa syudad si Jeremy Barnes, director-general sang National Museum of the Philippines.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginapangita ni Barnes ang foundation sang Fort San Pedro sa Iloilo City Engineering Office.
Nagpasalig man ang alkalde nga kun yara pa ang foundation sang Fort San Pedro, planuhan sang syudad ang pagpakay-o sini.
Kung madumduman, sang kongresista pa si Treñas, nagpasar siya sang layi nga nagatukod sang tourism highway sa syudad halin sa Fort San Pedro, padulong sa Calle Real, Jaro Plaza kag Molo Plaza kag ginaplano man nga dal-on ang Arevalo.
