ILOILO CITY – Maga-umpisa na sa masunod nga semana, Marso 28, ang four day-work week scheme sa Iloilo City Hall.
Nahibaluan nga ang nasambit nga scheme ang ginrekomenda sang National Economic and Development Authority (NEDA).
Sa interview sang Bombo Radyo kay Iloilo City Mayor Jerry Treñas, iya ginpahayag nga katuyuan sini nga mabuligan ang mga empleyado sa Iloilo City Hall nga apektado sang wala untat nga pagsaka sang presyo sang gatong.
Katuyuan man sini nga makatipid ang gobyerno sang syudad sa paggamit sang kuryente.
Target sang Iloilo City Hall nga mag-operate umpisa las 7:00 sang aga tubtob las 6:00 sang hapon, humalin Lunes tubtob Huwebes.
Gin-athag man sang alkalde nga indi naman kinahanglan ang overtime pay para sa mga empleyado nga sakop sang 4 day work week scheme bangud wala man ginpasobrahan sa 40 hours ang ila nga oras sa pag-trabaho.
Suno kay Treñas, ang mga empleyado naman nga nagakinahanglan nga magpabilin sa pagtrabaho sa sulod sang lima ka adlaw nga schedule amo ang yara sa district health centers, personnel sang Public Safety and Tranportation Office (PSTMO), City Engineer’s Office kag iban pa nga yara sa mga opisina nga naga-provide sang essential services.
Ang city-owned modern jeepneys kag mga bus ang magadul-ong kag sugat sa mga empleyado sang Iloilo City Hall halin sa ila tagsa ka district plazas.
Dugang pa sang alkalde, sa mga pribado nga kompaniya kag iban pa nga ahensya sang gobyerno, nakadepende na sa tagsa ka pamunuan kun i-adoptar man nila ang four-day work week.
