ILOILO CITY – Dako ang mabulig sang major rollback sang presyo sang gatong para sa mga drivers nga direkta nga naapektuhan sang nagtaas nga presyo sang petrolyong produkto.
Sa interview sang Bombo Radyo kay Joebert Gallentes, driver sang jeep nga may byahe Jaro CPU-Ungka, iya ginpahayag nga bisan papaano, makabawi sila nga mga drivers.
Suno kay Gallentes, ang balor sang rollback ang makadugang sang ila nga ginansya.
Sa adlaw-adlaw, nagatughong si Gallentes sang 20 ka litro sang gatong kag naglab-ot sa P500 ang arkila sa unit sang jeep.
Sang una, nagadangat lang sa P400- P500 ang iya madala sa ila balay apang subong, nagalaum siya nga madugangan ini sang P200.
Pahayag dugang ni Gallentes, mas maayo kung mas panubu-nubuan pagid ang rollback sang presyo sang gatong agud nga mas dako pagid ang ila nga maginansya.
