ILOILO CITY – Importante buhi.
Ini ang pahayag sang isa ka iloy nga nasunugan kahapon sa Brgy. Tanza Timawa Zone 2, City Proper matapos nga ginkawat pa ang iya kagamitan.
Sa interview sang Bombo Radyo kay Emma Bolbeo, iya ginpahayag nga napilas ang iya tuhod bangud sa pagdali-dali nga masalbar ang iya TV.
Ginbilin niya ang iya TV sa wayang agud nga magpalagyo sa kahangawa nga maigo sang kalayo.
Apang sa pagbalik niya, wala na ang iya TV kag wala naman niya naabtan ang iya washing machine sa iya balay.
Sang natapos na ang sunog, yara pa ang sin ukon atup sa iya balay apang sang liwat niya nga ginbalikan, ginbak-it na sang iban.
Suno kay Bolbeo, indi na siya magreklamo sa pulis bangud wala man siya sang may itudlo nga amo ang nagkuha sang iya gamit.
Nagpasalamat nalang si Bolbeo bangud wala siya napatay sa amo nga sunog.
Si Bolbeo ang isa gid lamang sa 39 ka pamilya nga nasunugan sang balay.
