Nangin inspirasyon sang isa ka Miss World Philippines candidate ang mga Ilongga beauties nga sanday Miss Universe Philippines 2020 Rabiya Mateo kag Miss Earth 2015 Angelia Ong.
Ini amo si Tsina Jade Chu, 23, kag Business Administration graduate sang University of the Philippines – Visayas kag nagatiglawas sang Iloilo Province sa Miss World Philippines.
Sa interview sang Bombo Radyo kay Tsina, tumandok sang Anilao, Iloilo, iya ginpahayag nga sang gamay pa siya, nangin Miss Intramurals ini kag Little Miss UN sa Hua Siong College of Iloilo.
Diri sa Iloilo, nagdaog siya bilang Miss Paraw Regatta 2018 Second Runner-Up, Miss Iloilo Tourism 2019, kag Miss Iloilo 2022 First Runner-Up.
Suno kay Chu, preparado na siya sa pageant sa diin sang Pebrero pa lang nag-umpisa na siya sa pasarela kag training sa question and answer.
Ginpahayag ni Chu nga ginaseryoso niya ang training bangud luyag niya nga madala pauli ang korona para sa mga Ilonggo.
