ILOILO CITY – Nagpanawagan ang United Nations sang bulig para sa $160 million ukon P9 billion para sa Pakistan sa nagapadayon nga pag-rescue sang army helicopters sa mga na-stranded nga pamilya kag nagahulog sang food packages sa mga indi malab-ot nga mga lugar kasunod sang “epochal” rains kag pagbaha.
Nahibaluan nga nagdangat na sa 1,100 ka mga tawo ang napatay nga nag-apekto sa 33 ka milyon ka tawo, nagguba sang mga pamalay, negosyo, infrastructure kag crops.
Suno kay UN Secretary-General Antonio Guterres, ang scale sang kinahanglanon sang pungsod ang naga-require sang collective kag prioritized attention sang bilog nga kalibutan.
Malapit naman sa 300 ang mga na-stranded lakip na ang mga turista nga gin-airlift sa northern Pakistan suno sa state-run disaster management agency kag masobra sa 50,000 ka mga tawo ang nagsaylo sa duha ka government shelters.
Ang mga tawo ang nagareklamo man sa mga shelters.
Suno sa isa sa mga nagsaylo didto, gina-agwanta na lamang nila ang kabudlay bangud nga wala na sang may nabilin sa ila.
Ang Estados Unidos naman ang mahatag sang $30 million ukon P1.6 biillion bilang suporta sa flood response sang Pakistan,
Ang kwarta ang magaagi sa US Agency for International Development (USAID) kun sa diin, maga-prioritize sa kinahanglanon nga food support, safe water, sanitation kag hygiene improvements, financial help, kag shelter assistance.
