ILOILO CITY – Nagapanawagan ang pila ka grupo sa Sri Lanka nga arestuhon na ang anay lider nga si Gotabaya Rajapaksa nga nagpalagyo sa amo nga pungsod kasunod sang panawagan sang publiko nga mag-resign ini.
Nakabalik na sa amo nga pungsod ang anay presidente matapos nga nagpalagyo upod ang iya asawa nga gin-updan sang military escort sa iya pagbiya.
Gin-anunsiyo sang presidente ang iya resignation sang yara na siya sa Singapore.
Suno kay Joseph Stali, pinuno sang trade union sang mga manunudlo, nagbalik sa amo nga pungsod si Rajapaksa bangud nga wala na sang pungsod nga mabaton sa iya kag wala na siya sang panagu-an.
Dugang pa niya, dapat na ini nga arestuhon sa gilayon bangud sang gintuga nga pagpakabudlay sa 22 milyones nga tawo sa Sri Lanka.
Ang gobyerno sa idalom ni Rajapaksa ang gin-akusaran sang indi maayo nga pag-manage sang ekonomiya nga amo ang ginhalinan sang krisis.
Si Rajapaksa ang nag-abot sa main international airport sa Colombo kag ginkulintasan pa sang bulak sang welcoming party of ministers kag senior politicians.
Ginbyahe siya upod ang security convoy padulong sa iya bag-o nga official residence nga ginhatag sang gobyerno sang iya successor nga si President Ranil Wickremesinghe.
Ang mga rights activists ang nagpanawagan nga arestuhon ini bangud sang madamo nga kaso lakip na ang gina-alegar nga kaangtanan sini sa pagpatay sa editor sang isa ka newspaper nga si Lasantha Wickrematunge sang 2009.
Magluwas sina, may mga corruption cases pa ini.
Sa US court, may kaso ini nga murder bangud sa pagpatay kay Wickrematunge kag ang pag-torture sang Tamil prisoners.
