Kumpyansa ang Communist Party of the Philippines (CPP) nga makaangkon sang dugang nga pwersa sa masunod nga mga tinuig apisar nga napatay na subong nga Disyembre ang ila nga founder kag longtime chairperson nga si Jose Maria Sison ukon mas kilala nga Joma Sison.
Kabahin ini sang kaundan sang 24-ka-pahina nga dokumento nga ginpaguwa sang grupo kadungan sang ila nga 54th founding anniversary subong nga adlaw, Disyembre 26.
Sa amo nga dokumento, ang imbukada amo ang tribute sang CPP central committee kay Sison kag gindayaw man ang ila nga ginpahayag mga “guerrilla fighters” nga “nagasakripisyo para sa ila nga mga kawsa.”
Sa amo man nga dokumento, ginpakamalaot sang central committee ang economic kag foreign policies sang administrasyon ni President Ferdinand Marcos Jr, partikular na ang pagpaayo sang relasyon sa US kag China — ang superpowers nga gin-brand sang CPP bilang mga “imperialists.”
Baliskad naman sa claim sang gobyerno nga nagakapapas na ang New People’s Army kag nahimo na lang nga 24 ka guerrilla fronts, ginpahayag sang CPP nga buhi kag nagabaskog pa gid ang ila nga mga tropa.
Ginpahayag pa nga may masobra 110 ka guerrilla fronts nga naestablisar ang NPA sa pungsod kag may yara sang man sang linibo ka local mass organizations.
Ginpadayaw pa sang CPP nga wala nahadlok ang guerrilla units sang NPA sa mas madamo nga numero sang pwersa sang gobyerno kag sa ila mas madamo nga armas. ##
