Iloilo – Ginakabig nga problema sa probinsya sang Iloilo ang nagapayon nga pagbuhin sang suplay sang baboy.
Ini matapos nakit-an nga nabuhinan sang 36% ang suplay sini humalin sang Oktubre 2022.
Sa interview sang Bombo Radyo kay Governor Arthur “Toto” Defensor Jr., iya ginpahayag nga ginatinguhaan sang iya opisina nga mapadasig ang pag-recover sang mga baboy gikan sa African Swine Fever.
Suno kay Defensor, nangin lihuk na sang opisina amo ang pagbulig sa 15 ka mga kabanwahanan sa probinsya sang Iloilo bilang mga lugar kun sa diin pagatukuron ang mga sentinel para sa dugang nga monitoring sang mga baboy kag amo man pagpadamo ukon repopulation sang mga ini.
Nahibaluan nga sa data sang 2021 Philippine Statistics Authority, yara sa Top 4 ang probinsya sang Iloilo sa top hog-producing provinces.
Sa subong, nagapadayon ang kampanya sang kabanwahanan paagi sa prevention containment kag repopulation program sang mga baboy.
I-check man suno kay Defensor kun may mga barangay sa red zone areas nga mahimu na makasagod liwat sang baboy para mabawi ang nadula nga population sang baboy.
