ILOILO CITY – Nagalaum sa gihapon si Presidente Ferdinand “Bongbong” Marcos Jr. nga malab-ot ang handum nga P20 per kilo ang balor sang bugas sa pungsod.
Ini ang pahayag ni Marcos kadungan sang launching sang Kadiwa Ng Pangulo sa Pili, Camarines Sur.
Katuyuan sang proyekto nga mahatagan sang direct market ang mga produkto sang mga mangunguma, manugpangisda kag mga micro, small, and medium enterprises.
Suno kay Marcos, amat-amat na nga malab-ot ang promisa niya antes magpungko bilang presidente bangud sa subong, yara na sa P25 ang presyo sang kada kilo sang bugas.
Sa mga Kadiwa stalls, ang isa ka kilo sang bugas ang ginabaligya sa balor nga P25.
Pahayag ni Marcos, may yara sang masobra sa 500 nga mga Kadiwa stalls sa bilog nga pungsod nga may katuyu-an nga mahatagan sang mas barato nga basic commodities ang mga kunsumidor.
Base sa price monitoring sang Department of Agriculture as of March 15, ang presyo sang well-milled rice sa mga merkado sa Metro Manila ang yara sa P40 tubtob P46 per kilo.
Nahibaluan nga isa sa mga campaign promises sang presidente amo nga mapanubu-an ang presyo sang bugas tubtob P20 per kilo.
